Farouk Ismail, di sala 1957an da ji dayik bû. Di sala 1979an da li Zanîngeha Helebê (Sûrîye) lîsansa Zimanê Erebî qedand. Di sala 1984an da li heman zanîngehê derçûna xwe ya lîsansa bilind stand. Paşê li Zanîngeha Tubingenê (Almanya) dest bi xwendina doktorayê kir. Teza xwe ya ku li ser Ziman û Şaristanîyên Rojhilata Kevn (Altorîentalîstik) û Fîlolojîya Zimanên Semitîk amade kiribû, di sala 1991ê da parast û wekî doktor derçû. Di sala 2005an da li Zanîngeha Helebê pileya profesorîyê girt. Di salên 1997-2000î da li Zanîngeha Taizê (Yemen), di salên 2013-2017an da li Zanîngeha Mardîn Artûklûyê, di salên 2017-2020an da li Zanîngeha Hambûrgê (Almanya) û di salên 2020-2023an da li Zanîngeha Berlînê (Almanya) wekî mamosta û lêkolîner ders dane û xebitîye. Di warê pisporîya xwe da 17 pirtûk nivîsîne û 30 gotarên wî di kovarên bihekem da hatine weşandin. Hin ji van gotaran di Ansîklopedîya Erebî (Şam) da, û Ferhenga Dîrokî ya Zimanê Erebî li Şarîqa hatine çapkirin. Ji almanî jî 8 pirtûk wergerandine erebî. Di sala 2010an da Xelata Wezareta Xwendina Bilind a Sûrîyeyê û di sala 2024an Xelata Jêhatîbûna Zanistî ji Yekîtîya Arkeologên Ereb li Qahîreyê wergirtîye. Ji dema xebatên xwe yên li Zanîngeha Mardîn Artûklûyê ve li ser destnivîsên kurdî lêkolînan dike.